ព្រះគ្រីស្ទជាគ្រប់ទាំងអស់ដល់អ្នកហើយ ( ខ ១០៥ )

១.ព្រះគ្រីស្ទជានំបុ័ងជីវិត    អ្នកណាមកឯទ្រង់ពិត     នោះនឹងមិនឃ្លានទៀតឡើយ 
អ្នកណាបានជឿដល់ទ្រង់ហើយ    ទ្រង់មិនបោះបង់ចោលឡើយ    ទ្រង់ឲ្យជិវិតអស់កល្ប 
ព្រះគ្រីស្ទជាពន្លឺលោកិយ   អ្នកណាតាមទ្រង់រាល់ថ្ងៃ     នោះមិនងងឹតទៀតឡើយ 
អ្នកណាបានទទួលទ្រង់ហើយ   ទ្រង់មិនបោះបង់ចោលឡើយ   ទ្រង់ឲ្យពន្លឺជីវិត    ។ 

២.ព្រះគ្រីស្ទពិតប្រាកដជាទ្វារ    ចៀមអាចចូលបានគ្រប់គ្នា    យកទីពឹងពាក់អាស្រ័យ 
ចៀមណាបានចូលតាមទ្រង់ហើយ   ទ្រង់មិនបោះបង់ចោលឡើយ   ទ្រង់ឲ្យវាលស្មៅជីវិត 
ព្រះគ្រីស្ទជាអ្នកគង្វាលល្អ    សុខចិត្តបង់ជីវិតប្ដូរ      ជំនួសហ្វូងចៀមទ្រង់ហើយ 
ចៀមណាដែលទ្រង់បានឃ្វាលហើយ     ទ្រង់មិនបោះបង់ចោលឡើយ 
ទ្រង់ជួយឲ្យរួចទុក្ខភ័យ   ។ 

៣.ព្រះគ្រីស្ទជាក្ដីរស់ឡើងវិញ     ជាជីវិតដ៏ពោរពេញ      មិនចាញ់មច្ចុរាជសោះឡើយ 
អ្នកណាបានជឿដល់ទ្រង់ហើយ ក្ដីស្លាប់គ្មានអំណាចឡើយ ទ្រង់ប្រោសឲ្យរស់ឡើងវិញ 
ព្រះគ្រីស្ទជាផ្លូវជាក្ដីពិត    ហើយទ្រង់ក៏ជាជីវិត      មកតាមទ្រង់មិនខុសឡើយ 
ក្រៅពីទ្រង់គ្មានផ្លូវទៀតឡើយ    ផ្លូវទ្រង់បានរៀបឲ្យហើយ    ផ្លូវទៅព្រះវរបិតា    ។