មានពរហើយ ( ខ ២៣៦ )

១.ឱពួកកំសត់ខាងវិញ្ញាណអើយ អ្នកពិតជាបានពរហើយ ដ្បិតព្រះទ្រង់សព្វព្រះទ័យ បើកនគរឋានសួគ៌ថ្លាថ្លៃ 
ឲ្យអ្នកចូលដោយសេរី  យកទុកជាទ្រព្យ     ។ 

២.រីឯពួកអ្នករែងព្រួយយំសោក  ព្រះពរដ៏ពិតធ្លាក់មក ឲ្យអ្នកមានចិត្តស្រាកស្ងប់  ក្ដីកំសាន្ដប្រទាន យ៉ាងគាប់ 
ដ្បិតព្រះអម្ចាស់ទ្រង់រាប់ ថាគួរនឹងបាន ។ 

៣.អស់អ្នកស្លូតត្រង់ក៏មានពរពិត ពរខ្ពស់ថ្លៃថ្លាវិចិត្រ នឹងគ្រងផែនដីជាឋាន ទុកជាទ្រព្យមរតកថ្កើងថ្កាន 
ឥតមានអ្នកណានឹងហ៊ាន ដកហូតយកឡើយ     ។ 

៤.ខាងពួកអ្នកដែលចង់បានសុចរិត ស្រេកឃ្លានយុត្តិធម៌ពិតៗ ទៀងត្រង់ត្រឹមត្រូវបានហើយ	អ្នកនឹងឆ្អែតឥតខ្វះ ខាតឡើយ 
ដ្បិតព្រះបានរាប់អ្នកហើយ ថាអ្នកសុចរិត    ។ 

៥.មានពរ   អស់អ្នកមានចិត្តមេត្តា មានក្ដីសន្ដោសករុណា សន្ដានចិត្តទន់អាណិត អ្នកនឹងបានព្រះប្រទានពិត 
ឲ្យសមករអ្នកប្រព្រឹត្ត ដោយក្ដីមេត្តា   ។ 

៦.អ្នកដែលមានចិត្តល្អបរិសុទ្ធ មានពរដូចទ្រង់សន្មតិ ជាពរវិសេសថ្លៃថ្លា ព្រះសម្ដែងឲ្យឃើញភ័ក្ត្រា 
ពេញសេរីល្អអស្ចារ្យ មិនអាចផ្ទឹមបាន ។ 

៧.អ្នកផ្សះផ្សាគេឲ្យជានឹងព្រះ មានពរផ្ដល់ឲ្យច្រើនណាស់ ព្រោះអ្នកនាំគេវិលថ្កាន ប្រែចិត្តចោលផ្លូវបាបសាមាន្យ 
ជឿព្រះនោះអ្នកនឹងបាន	ជាកូនព្រះពិត   ។ 

៨.ចូរអរសប្បាយពួកត្រូវបៀតបៀន ត្រូវគេតិះដៀលបំពាន ដោយព្រោះសេចក្ដីសុចរិត ពោលបង្កាច់ខុសសេចក្ដីពិត 
ដោយសារនាមម្ចាស់ជីវិត នឹងបានឋានសួគ៌  ។