ឲ្យត្រូវសេចក្តីល្បួង ( ខ ២៣២ )

១.ជួនកាលព្រះអម្ចាស់  បើកឲ្យកើតមានសេចក្តីល្បួង មកដល់យើងតែម្តង      ប្រយោជន៍ឲ្យយើងចេះប្រុងប្រៀប 
កាលណាការណ៍កើតឡើង គួរយើងដឹងថាព្រះទ្រង់រៀប ផ្លូវឲ្យយើងជៀសបាប  ក្រែងជំពប់ដួលហួសប្រមាណ   ។ 

២.ប្រៀបដូចត្របកភ្នែក    តើកំទេចចង់ចូលតាមណា វាធ្មេចបិទការពារ       ខ្លាចមានការណ៍ចូលនាំរំខាន 
ព្រះគង់ជិតកុំខ្លាច       គ្មានអ្វីអាចមកប៉ះញល់បាន កូនព្រះដឹងប្រមាណ   ដ្បិតយើងមានព្រះគង់ក្នុងខ្លួន    ។ 

៣.ការល្បួងតែងកើតឡើង    ដោយសារយើងមិនប្រុងប្រយ័ត្ន ចំណង់សាច់ឈាមរិត   ឲ្យដួងចិត្តត្រូវចាប់អង្រួន 
ធ្លាក់ចូលក្នុងអន្ទាក់  មានគ្រោះថ្នាក់ជំពប់ដួលផ្ទួន ចាក់ទម្លុះទាំងខ្លួន      មិនមាំមួនត្រូវអន្តរធាន    ។ 

៤.ព្រះចង់ល្បងជំនឿ    ឲ្យយើងដើរអែបជាប់ព្រះអង្គ មានការត្រូវពឹងទ្រង់      ដ្បិតព្រះអង្គជួយយើងមិនខាន 
ល្បងជាប់ឡើងថ្នាក់ថ្មី    ថ្នាក់ពេញវ័យអាងជំនឿបាន តាំងទ្រង់ទុកក្នុងប្រាណ   ល្បួងប៉ុន្មានយើងត្រូវជៀសផុត   ។