ព្រះអង្គជាអ្នកគង្វាលខ្ញុំ ( ខ ១៨១ )

១.ព្រះអង្គជាអ្នកគង្វាលខ្ញុំ    ប្រសើរឧត្តមលើសជីវិត ខ្ញុំនឹងមិនខ្វះអ្វីៗពិត  ព្រោះក្តីងងឹតបានខ្ចាយខ្ចាត់     ។ 

២.ទ្រង់ឲ្យខ្ញុំដេកសម្រាកនៅ ទីដែលមានស្មៅខៀវស្រងាត់ តែងនាំខ្ញុំទៅឯក្បែរមាត់ ទឹកមានទៀងទាត់ថ្លាវិចិត្រ       ។ 

៣.ទ្រង់កែព្រលឹងខ្ញុំឡើងវិញ ដោយនាំខ្ញុំចេញពីទុច្ចរិត ឲ្យខ្ញុំបានយល់ពន្លឺពិត ឃើញក្តីសុចរិតនៅក្នុង   ទ្រង់    ។ 

៤.ទោះបីក្នុងពេលទូលបង្គំ  ដើរកាត់ច្រកភ្នំពឹងព្រះអង្គ ខ្ញុំគ្មានខ្លាចឡើយព្រោះអីទ្រង់ បានកំចាត់បង់សេចក្តីស្លាប់    ។ 

៥.ខ្ញុំមានព្រះអង្គរងជាខ្នង ព្រនង់ដំបងទ្រង់នៅជាប់ ​ការពារកន្លែងសម្រាប់ផ្គាប់  ចិត្តខ្ញុំឲ្យជាប់នឹងព្រះអង្គ          ។ 

៦.ទ្រង់បានរៀបតុសម្រាប់ខ្ញុំ ដោយម្ហូបឧត្តមឥតផ្ទឹមផង ​នៅមុខពួកខ្មាំងសត្រូវទ្រង់  ឲ្យឃើញព្រះអង្គជាអម្ចាស់     ។ 

៧.ទ្រង់បានចាក់ប្រេងលាបក្បាលខ្ញុំ  លើកតាំងឡើងកុំឲ្យក្រឡាស់ នៅជាប់ព្រះអង្គ យ៉ាងជាក់ច្បាស់ ព្រះគុណច្រើនណាស់ត្រូវនឹកចាំ ។ 

៨.ប្រាកដជាសេចក្តីសប្បុរស  មេត្តាប្រោសលោះពីបាបកម្ម ករុណាជាប់នៅ  ឥតប្រែះស្រាំ លើរូបខ្ញុំអស់មួយជន្មា ។ 

៩.ព្រះដ៏ពិតជ្រាបគ្រប់ទាំងអស់ ទ្រង់ជ្រាបឥតខ្ចោះលើមាគ៌ា ដែលរៀបចំឲ្យពួកស្ងួនភ្ងា ឆ្ពោះឋានសួគ៌ាដ៏អស្ចារ្យ  ។ 

១០.ជ័យជម្នះទ្រង់បានផ្តល់មក  គួរទទួលយកកុំរួញរា តាមទ្រង់ដោយស្មោះ ក្នុងមាគ៌ា ទ្រង់នឹងការពារថែរក្សា    ។